يد محشنه لكن مبدعه

akram-THEKING الخميس سبتمبر 13, 2007 11:06 pm

بسم الله الرحمن الرحيم

شن الجو يا بلابيل و يا بشابيش ، كل بشبوش بروحه

كلمة هذه كنت نقول فيها من زمان ، طلعلي واحد يومتها

تما يحلف يقولي أنا ألي إخترعتها ....

باهي يا سيدي راك تقولي مخترع كلمة فلاطيح المستقبل و دعاليج الغد

و كشاكيش الحياة كخخخ بصوت واحد مرقيها ليا زردت معاه

خطرها على السباسيب ، ملاحظ أن في شباب واجدين

تمو يطولو في شعرهم ، مش مشكلة بس المشكلة

لما يعدي ألي مطول شعره هذا السحنون معاك لعاصمة العجاج

طبرق ، كيف يصير يا عرب هو و يقعد يحكي للرعوية(جمع راعي ) على البراوزينك والديزاينات

ألي إخترعهن حضرته ويقعد يحكيلهم على بيكاسو ( تي وحق ربي واعره ) .

و هما واخذين عليك أنك بري و أبن الصحراء

تحرقلهم الفيلم بكل ( فيلم رامبو ) ، عليك القديم حتى انا من أيام فيديو الشرطان

المهم ، اليوم نحكو على لما يقعد الواحد شكله قهوي و محشن و و مقمل

بس في نفس الوقت مبدع و فنان ، و مثقف و ما يفوت عليه شي

و فصيح و يقدر يسكتلك الدكتور على خشيم ، من المعلومات ألي عنده

تقهرك حركة وحده لما الشخص الطيب المحشن هذا يسكت واحد بلبول

يجي البلبول يسبل بأن الشخص ألي قدامه مش مستوى و معفن و محشن

خصوصاً لما المحشن والبلبول يزردو معا بعضهم ، البلبول يطلع صابونه دوف

و يغسل إيديه و يقولك ما نبيش حد يشم بنة التن في يديا ( ياييييي بصوت دفل جن هههههههه)

هههههه ، والله العظيم حاله ، لاحظت أن في الفترة الي فاتت ، في بنات واجد في الجامعة

تحجبن والحمد لله ، هذه بادرة كويسه و العقبه للقبيه ، بس في نفس الوقت لاحظت شخشرة

الكثير و الكثير من الشباب ، يا في الشكل يا في اللبس يا في الديزاين على راي صاحبنا ألي حشم بيا

في طبرق ، نصيحه مني ، ما تاخذوش الناس بناظرها و لا بأشكالها ولا بدبشها و لا بعملها

كم من دكتور حمار ( لا مؤخزه ) و نصاب ، و كم من ميكانيكي شريف و ولد ناس و متعلم و مثقف

بس الناس تنظر لهذا دكتور و هذا ميكانيكي ، جو الفقراء لا يدخلون الجنة

و الله ما يخش الجنة إلا الحرايمي و النصاب والي قاطع يده من ربي ( بصوت عزوز تحت الأقواس )

المهم ربي يخلي ستره في عبادة و كل سنة و أنتم طيبين

و لقد كتبت هذا الموضوع بيدي المحشنه المبدعه Laughing